الأربعاء، يوليو 02، 2014

الحمد لله

إحمد ربنا على حاجة فرحتك في عز حزنك
إحمد ربنا على نظرة تشجيع في عز يأسك
إحمد ربنا على ستره ليك في موقف محرج
إحمد ربنا على الناس اللي حبوك حتى لو فارقوك
إحمد ربنا على أكلة حلوة دوقتها حتى لو ماتكررتش تاني
إحمد ربنا على احساسك بالسعادة حتى لو ماكملتش
إحمد ربنا على الحاجات الصغيرة يرزقك بالأحسن منها
"ولإن شكرتم لأزيدنكم"

السبت، مارس 08، 2014

يا دنيا

دلوقتي ...
محتاجة ألملم كراكيبي وفعاكيشي وورقي
وأرتبها
بطريقة مفعكشة عاقلة
أنا بس اللى أعرف شفرتها
وألملم بردك حكاياتي
وأجري ألحق الدنيا اللى بتجري ومش سائلة
أديها ورقها وحكاياتها اللي نستها معايا
وأقولها:
يا ريت يا دنيا ماتدينيش
كراريس جديدة
لحكاية جديدة
أصلي تعبت من الحكايات

السبت، فبراير 22، 2014

الى كل الناس


ربوا ولادكم كويس واتقوا الله فيهم.....
التربية يعني يكونوا ناس اسوياء يتحملوا مسؤولية ويتحملوا نتائج افعالهم بشجاعة ويواجهوا الحياة بمشاكلها بعقل ورزانة
التربية مش انهم يلاقوا كل حاجة عايزينها ولا ان طلباتهم تبقى كلها مجابة .... عشان لما يكبروا والدنيا تتغير معاهم مايلوموكوش على تقصيركم في حقهم.... ويأذوا الناس بسوء تصرفهم....
قبل ما تدخلوا ولادكم اغلى مدرسة ،علموهم ان رضاكم عنه اغلى حاجة في الدنيا .... وقبل ما تشتروا اشيك لبس ، علموهم ان الدين والاخلاق هي زينتهم في الدنيا .... وقبل ما تشتروا احدث لعب ،علموهم ازاي يبقوا متسامحين وازاي يشاركوا اخواتهم في لعبهم بحب ورضا....... قبل ما تفصلوهم كل واحد في اوضة ،حسسوهم انهم لسه عايشين في قلب اسرة و في قلوبكم،عشان يتعلموا يعني ايه بيت واسرة وصلة رحم..........
احتووهم ،احرموهم من اللعب والفسح واللبس لكن ماتحرموهومش من مشاعركم .... عاقبوهم بس ماتقاطعوهومش ولا تخاصموهم عشان يتعلموا ان مهما اختلفنا فاحنا برده هنفضل نهتم ونحب بعض....
علموهم ان الكدب حرام،وان المؤمن عمره ما يكون كداب.......ولما يعترفوا بغلطة سامحوهم عشان يعرفوا ان الصدق منجي ويتعلموا انهم يكونوا صرحاء مع نفسهم
علموهم الاحترام باحترامكم لبعض .. مش بس قدام بعض لكن كمان من ورا بعض...
 علموهم ان الانسان هو اللى بيجيب الحاجات دي كلها وهو اللي بيعملها....لكن كل الحاجات الحلوة دي عمرها ما تعمل انسان عنده احساس واخلاق ودين .........للاسف ال3 حاجات دول عمرنا ما بنشتريها ... عشان هي أغلى من أي ثمن.
علموهم كل الحاجات الحلوة......وحسسوهم بكل المشاعر الجميلة......وربوهم على كل الاخلاق الحميدة .......
بس الاول اتعلموها انتم .. وطبقوها على نفسكم .. عشان هما بيتعلموا عملي مش نظري .. عشان انتم القدوة .. وعشان كما تدين تدان

ربوا ولادكم كويس واتقوا الله في ولاد الناس.... وافتكروا ان ولادكم هما مجتمع بكرة ..هما اب وام بكرة .. شوفوا بقى عايزين بكرة يبقى عامل ازاي .. يا دعوة ليكوا في قبوركم .. يا دعوة عليكم